حدوته ملتوته بقلم إيمان عوض 🇪🇬

حدوته ملتوته

انا اللي بفتح ماسبيرو زمان

و إذاعة الاغاني و إذاعة القرآن

بستنى الفجر يطلع و ادور ع النهار

و الشمس لما تشقق ابص بانبهار

و اقفل صوت الاغاني لما اسمع الاذان

ولما بابا يجي احس بالامان

وماحدش يتكلم و هو بياكل لبان

وأقول حالو يا حالو و بالفانوس بدور

و اسمع بليل حكاية حلوة لبدر البدور

و أصحى الصبح أصبح وقول صباح النور

و شاي العصاري مع تسابيح الطيور

و رافت الهجان ورجل المستحيل

و ملف المستقبل و رفعت اسماعيل

لسه عايز دليل

بستنى قدوم رمضان

و هلاله لما يبان

ولمة العيله كلها عالفطور

وسهرة السحور

بفرح بليلة العيد و بفستانه الجديد

وبعد صلاته اطير واخد العيديه

ودخلة الربيع بحسها هديه

بنكبر كل مرة و الفرحه هي هي

و تقول هنتغير؟!

دي هويه منحوته

عجناها ذكريات كحكه في بسكوته

مصريه للنخاع وقوية باندفاع

بلا غرب بلا بتاع

ده المهد من بيتنا

طلعت شمس الحضاره من قلب قصتنا

و مما سلف له البيان

هفضل لحد الان.. اسرد حكايتنا

قصة لشعب اصيل باقي يقول مواويل

و مهما عدى عليه ثابت ثبات النيل

مهما بنوا له سدود هيعدي في حارتنا

و تطبيقا لذلك ده سر قويتا

اسمه هويتنا